Distance covered by primulas..

Tumhein gumaan hai..

Posted on: December 29, 2008

ke mein tum se pyar karti hun. Tumhare dil ka koi hissa tumhein tasalli dai raha hai ke shayeed yeh jo kashish hai humare darmian woh meri muhabbat ka shaksana hai. Tumhein apne aap pe barra rashk aata hai yeh soch ke ke mera dil tumhare ikhtiar mein hai. Meine dheeme dabay lehjey mein kitni barr kaha ke mujhe tum se mohabbat nahin. Tum abhi kamsin ho. pyar, ishq aur mohabbat ke fark ko nahin jaante. Pyar to mujhe hawa, badal aur barish se bhi ho jaata hai. Mohabbat ke layak paiker koi mila hi nahin, aur ishq , ishq to aasman pe baithey kisi mehrbaan se karti hun, jo mere dard aur bardasht ko azmaata rehta hai, mager kabhi bhi takleef jaanlewa nahin hoti. Mein kaise samjhaun tumhein ke mein tumhein pasand karti hun mager yeh pyar vyar nahin hai. Yeh jo tumhari sohbat acchi lagti hai aur hum pehron baton mein gum rehte hein tum issey lamhon ki rafaqat ke siwa kuch na samajhna. Mera dil sada ka banjar hai, tumhare kurb ki boondain pal do pal ke liye iski mitti ko nam kar daiti hain. Yeh nammi tumhare saath mein qayam rehti hai to mujhe ehsas hota hai ke shayad dil ki udasi aur veerani kam ho gaye. Lekin jab tum chale jaate ho to wohi meri zaat hai aur wohi sada ki gudazi. Itni boondain tumharey paiker mein kahan ke mujhe sairaab kar sako.

Yehi kaho ge na ke ager baat sirf dosti aur mehfil ki hai, to kitne aansoo, kitni yadain mere saath banti hein tum ne. Ager yeh muhabbat nahin to aur kia hai? Ab kaise kahun ke hum thehrey shair aur deewaane. Humare dil ki daastaan konsi seegha e raaz mein rehti hai. Kabhi shairee mein dil ki bharas nikal jaati hai to kabhi afsanon mein. Baat itni si hai ke baat hoti rahe. Yeh koi anokha majra nahin ke hum kisi se dil ki baat kahein ya sunain. Humein to eik umer ho gaye hai iss shiddatt se jeetey huve. Yeh jazbey mere dharkan ke mutradif hein aur inka izhaar saans laine ki tarha laazim o malzoom hai. Ab bhala koi dharkan ko sanson se kaise judaa kare. Rahe yeh aansoo, to kia kahun, yeh paimana itna labraiz hai ke eik boondh bhi kaafi hoti hai isse chalkaane ke liye. Hum itne nadaan hain ke hanstey hanstey ro parte hein. Iss liye nahin ke koi khas gham hai, bas yunhi azad rooh hain, jab jee chaha hans parre, jab dil kiya ro diye.

Rahi baat pyar ki, to agar tum se pyar hota bhi to tumhari anaparasti ke aiwaz hum bhi keh daitey ke hum tum se pyar nahin karte. Kuch anaparaston ke saath anaparast hona parhta hai. Ab yeh baat tumhare sochne ki hai ke hum waqai tum se pyar nahin karte ya sirf khuddari mein tumhein mana kar rahe hain. Eik umer lage gi tumhein yeh uljhan suljhaney mein, mager tum iss saza ke baad dubara kisi ke jazbon ki toheen nahin kar pao gay. Besakhta khayal aaya ke ager tumhein apni ghalti ka ehsaas ho gaya to yeh saza shayad jurm ki monasbat se bohot sangeen hai. Phir socha ke nahin, saza to ghairon ko dee jaati hai, mein sirf apne eik bohot azeez dost ko samjha rahi hun ke rishton natoun ki kader kiya karey. Jab dil koi baat mehsoos karey to uskey izhaar mein kanjoosi nahin baratni chahiye. Jab koi tumhari kader karey to usko palkon par bithao. Yeh na ho ke tumharey hathon kisi ka dil tootey aur tum uss zakhm ki marham na de sako. Pyar to kisi ko bhi kisi se ho sakta hai, aur iss naimat ke dotarfa hone ki koi shart nahin. Phir agar hum mein se koi eik bhi doosre se pyar karta hai to phir ana kaisi aur yeh gharoor kis baat ka? Kuch nahin to hum iss inam ke aiwez izzat dai sakte hein us dil ko jis ne humein muhabbat ke laik samjha.

Agar sun pao to suno. Yeh sach hai ke Mein tum se pyar karti hun. Humare darmian ki kashish meri muhabbat ka shaksana hai. Mera dil tumhare ikhtiar mein hai, tum chahe mano ya na mano. Tumharey saath pehron guftago karna ab meri zindagi ka hasil hai. Yeh tamamm ghubaar jo meray dil ne nikala hai woh sirf uss ghusse ka izhaar hai jo mein tumhari bedardi ki wajah se karna chahti hun. Jao yeh sun ke khush ho lo keh har baazi ki tarah yeh baazi bhi tum ne mujh se jeet li. Iss liye nahin keh tum kisi tarha mujh se behter ho balke sirf iss liye ke mein apne dil ke hathon majboor hun. Jao aur iss baat pe umer bhar naz kartey raho keh tum ne meray dil ko thukraya aur mein ne koi ehtejaaj tak na kiya. Meri mohabbat ki takmeel agar tumse harne mein hai to mein haar maan leti hun. Abhi issi waqt apni harr man laina sehal hai mere kamsin jazbon ke liye, kyunke tumhare kareeb umar bhar harne ki himmat shayeed mujh mein nahin. Mein janti hun keh humare darmian kuch ajeeb sa rishta hai , mager yeh na kaho keh humare darmian muhabbat nahin. Jee chahta hai ke ager koi eik rimak bhi hai ehsaas ki to woh tum meray saath bant lo tak’e meray liye tumhari yaad mein koi thori si bhi karwahat na ho.

 

Advertisements

9 Responses to "Tumhein gumaan hai.."

You ve written it beautifully, esp the selection of words is commendable.
I read somewhere that “mohabbat mein ana kaisi aur ana-parasti kaisi, ya to insaan mohabbat kar lay ya phir apni ana ki taskeen…..”

Very powerful and beautiful. I usually don’t read roman scripts but this one I couldn’t stop reading.

Nicely written!

I agree ego should not come in love, but those who love do not hurt other’s ego neither do they test them.
Love ( with any creature ) like any other thing in this world obeys the laws of physics…one being action and reaction have to be equal..else it is just a theory…an unproven one
“mil jaye tou mutti hai, kho jaye tou sona hai”

That was beautifully penned! Loved it.

Did you actually read it all, Sawant?

(: if yes,then I feel so happy!

Izhar can be difficult too .. it always is.

ps: when its long and in roman script I dont read either … but the start made me read to the end 🙂

Asma, everytime I see you here I miss Islamabad badly!

Yes I did read it all, my sweet little Dia. =)

It’s beautifully penned. Did it come out of one of those sad moments after the fights? -_-

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Advertisements

  • None
  • д§mд: love the way you've ended it :) please update :>
  • д§mд: goodness .. do I love this beautiful swinging chair or what :) Lovely snaps ... :) beautiful thoughts to go with 'em :>
  • Zios: It is hard to imagine anyone giving up driving because someone hit his/her car

Categories

%d bloggers like this: